حاجات غريبه فى اوقات اغرب

ساعات كتير بيبقى فى دماغى حاجات كتير عايز اكتبها و اقولها حاجات انا حاسسها بس اول لما اقعد اكتب مفتكرش ولا حاجه من الحاجات ديه مش عارف ليه



كل انسان بيحصل فى حياته حاجات ممكن يشوفها ممكن يحسها تناقضات غريبه فى اوقات اغرب ويبقى مش عارف ليه بيحصل كده بالذات فى الوقت ده مع انها لو كانت حصلت قبل كده كان ممكن تغير حاجات كتير ممكن تغير مستقبله كله


وتلاقى نفسك مش فاهم ايه اللى بيحصل ده وليه بيحصل فى الوقت ده بالذات


وحاجات كنت مستنيها تحصل فى وقت معين ومحصلتش وتحصل بعد ما خلاص يكون سبق السيف العزل .ليه كل حاجه مبتجيش فى الوقت اللى بنكون مستنينها فيه


انا الحمد لله مومن ان ربنا بيبعتلنا كل شئ خير فى ميعاده


ولكن لو الحاجات اللى كنا مستنينها فى وقت معين جتلنا فى الوقت اللى عايزينه كان ممكن ايه يتغير فى حياتنا


هل سيكون للحياه طعم اخر كما نتوقع ام ستكون مره ولا تطاق؟

لا للبرادعى

طبعا انا عمرى ما كان ليا فى السياسه بس اللى يشوف حال المصريين يتجنن



البرامج الفضائيه طول الليل تتكلم عن الرقى وان احنا بلد عندنا حضارة سبعه الاف سنه و عن المثقفين ولازم نغير عشان نتغير وكلام من ده كتتتتتتير وتلاقى الناس فى الشارع ملهاش دعوه باى حاجه خالص ومش فاهمه اصلا فى حاجه


بقالى كام يوم باركب المترو. و بسمع الميكروفونات شغاله فى كل محطه وست صوتها وقور كده قاعده تقول يا بنى ادمين الباب رقم 2 و 3 للنزول وامامهم خطوط صفراء والباب رقم 1 و 4 للصعود . انا قولت بس اخيرا حنبقا بلد محترمه وفيها نظام عشان اللى نازل ميدوس اللى طالع


وست تقول ده مبادره ونظام جديد ولازم كلنا نتعاون مع بعض


ولكن لا حياه لمن تنادى


الناس ولا كانها سمعه حاجه اللى طالع يزء اللى نازل واللى نازل ينفخ فى وش اللى طالع ولا كان حد بيقول اى حاجه .


اول يوم قولت عادى يمكن الناس لسه مش واخده على النظام الجديد او يمكن الناس دول اجانب ومش عارفين عربى المفروض الست تتكلم بالانجليزى او الفرنساوى عشان احنا شعب مثقف وبتكلم اكتر من لغه ولازم ندخل فى كل جمله كلمه او كلمتين بالانجليزى او الفرنساوى او يمكن البلد كلها بقت خريجه AUC وانا اللى مش عارف.. يعنى هما حيفتحو GUC & BUE لمين غير المثقفين المصريين


تانى يوم نفس النظام قولت عادى بردو لسه مش متعودين ولا يمكن مش سامعين الست ديه اصلها مش بتزعق واحنا طبعا شعب مبيخودش باله غير من الصوت العالى والزعيق بس لاننا متقدمين زياده على اللزوم اكتر من اوربا والدول الناميه ديه


ثالت يوم انيل وادل سبيل وهنا بقى فهمت اننا مينفعش معانا نظام اصلا.. ولا ديمقراطيه طبعا يعنى مينفعش نفهم بالكلام المحترم لازم يوقفوا على كل باب عسكرى من بتوع الامن المركزى ويمسك فى ايده عصايه يوجه الناس بيها طبعا عارفين زى ايه واللى يخالف التعليمات ياخذ على راس امه


وتلاقى عم البرادعى يقولك انا عايز الناس هى اللى تختار . تختار مين يا عم اذا كان اصلا مش سامعين حاجه ولا فاهمين اى حاجه واصلا مينفعش معاهم نظام ديمقراطى من الاصل


والاغرب بقى تلاقى الاشاره واقفه والدنيا زحمه ومحدش طايق حد ويطلع واحد من النص كده يفضل يضرب فى كلكسات ومحدش فاهم هو بيزمر لمين اصلا ابن المجنونه ده ما الدنيا كلها واقفه نقول يمكن بيزمر لموزه معديه ولا حاجه تلاقى الناس كلها بتبص فى عربيات بعدها وفى الشارع ومحدش شايف موزز ولا نيله مفيش غير الحر وريحه العرق فى عز يناير طب ده باه تسميه ايه


واللى يغيظك اكتر انك تلاقيه راكب عربيه باسات مثلا يعنى شكله محترم


اصله لو راكب مرسيدس ولا بى ام حتقول عليه ده اكيد حرامى عشان يركب عربيه زى ديه ولو راكب 128 ولا 127 حتقول ده معفن ابن ......


هو احنا كده مبنسبش الناس فى حالها وجاى تقولى ثقافه وتعليم وصحه يا عم لما نحترم بعض الاول نبقى نفكر فى التغير

بتيجى وتروح

بتيجى بين ايديه


وتروح قبل ما اغمض عنيا


بتيجى طيف جميل يسرق قلبى معاه


وتروح مسافات بعيد اجرى بعمرى وراه


بتيجى اوقات خطير بس مش كتير


وتروح بعيد واخاف منى تتوه


بتيجى اوقات امير تحضن قلبى الاسير


وتروح ويفضل قلبى وحيد


وتيجى بحالات كتير زى الليل الجميل


وتروح ايام كتير وانسى ايام العسير


وتيجى بركان كبير يخلى احساسى مرير


وتروح بعد ما تهد كيانى واستنى تانى من جديد

الاختيار الصعب

ما اصعب الاختيار



من اصعب الاشياء فى الوجود هو ان تختار بين طريقين


لكل شئ فى الحياه يوجد دايما طريقين فيجب عليك ان تسلك احدهما وتبقى فى حيره من امرك لا تستطيع ان تاخذ ايهما وترى ان كلاهما صواب فتزيد حيرتك اكتر وتظل تقدح ذناد فكرك ايهما اصلح لى. وتخاف ان تسلك الطريق الغلط


دايما لكل حاجه فى حياتنا سكتين .سكه يريد القلب ان يسلكها وسكه الاخرى يفضلها العقل ويرجحها . وتبقى انت محتار امشى ورأ مين فيهم عقلى ولا قلبى ما اصعب القرار.


ولكــن القرار الصحيح امامك وانت لا تاخذ به ولا تهتم به ربما لانك لا تفهمه ولا تراه انها العلامات . نعم تلك العلامات التى يرسلها لك الله وانت لاتستطيع ان تفسرها وتفهم معناها انها القرار الصواب الذى يريدك الله ان تختاره وتمشى به


كثير منا يرى هذه العلامات ولا يسطيع ان يعى معناها انها اشارات من الله ليلهمك الصواب . ولكن لابد ان يكون لديك الوعى الكافى لفهمها وتفسيرها .انها مجرد علامات بسيطه لا يعيها الا من يجيد القراءه جيدا . ان قراءه هذه العلامات ليس بالشئ الهين لكى تفهمها وتدركها فى الوقت المناسب لتاخذ القرارالمناسب


انها مجرد اشارات بسيطه يزج بها الله فى طريقك وتراها ويراها من حولك ولكن ليس لها معنى الا عند صاحبها الذى ربما يجيد قرائتها ويلتقتها ويعى اى طريق افضل


وكثيرا ممن لا يعرفون القراءه ولكنهم ايضا ليس بجاهلين لا يدركون ما راؤا وهم كثيرون حولنا


فحاول ان تسعى جيدا لتلتقط هذه العلامات او الاشارات التى يرسلها لك الله وتعلم قراتها جيدا لكى تختار القرار الاصواب فى الوقت الصحيح


حيث لا ينفع العوده من الطريق الخطا اذا اقبلت عليه ولم تفهم الاشارات جيدا


وحيث لاينفع الندم ولا البكاء فكلاهما لا يعيد الاختيار